სალომე ბაკურაძე: „მგონი, ჩემს შვილსაც ხვეული თმა ექნება...“

სილამაზის სალონს მხოლოდ საჭიროების შემთხვევაში ვსტუმრობ, რადგან ჩემი ბუნებრივად ხვეული თმა ამის საშუალებას მაძლევს.

სალონში, ძირითადად, თმის შესაჭრელად და მანიკიური-პედიკიურის გასაკეთებლად დავდივარ. მიუხედავად იმისა, რომ ჩემს თმას ცვლილებები დიდად არ ემჩნევა, მაინც ხშირად ვიჭრი, რადგან ხვეული თმა ფორმას მალე კარგავს.

თუ სადმე ღონისძიებაზე ან წვეულებაზე მივდივარ და კაბა მოითხოვს, აკადემიურ ვარცხნილობას ვიკეთებ, ოღონდ - არა რამე განსაკუთრებულს.

საერთოდ, სტილისტს ყოველთვის ვეუბნები, რა მინდა, მაგრამ ამ შემთხვევაში ნინიამ გადაწყვიტოს, როგორ დამვარცხნის, ოღონდ გასწორებულ თავს ვერ ავიტან!

ნინია ხარაზიშვილი, სტილისტი: სალომეს თმას ბუნებრივი, ჰაეროვანი და მოცულობითი ვარცხნილობა ძალიან მოუხდება, ამიტომ ვცადოთ. 

მიკვირს იმ ადამიანების, ვისაც ხვეული თმა აქვთ და სწორს ნატრულობენ. ჩემთვის ეს პრობლემა კი არა, ძალიან დიდი კომფორტია.

ჩემს მეუღლეს, ლაშას ძალიან უყვარს, როცა თმა ახალი შეჭრილი მაქვს. ისიც მოსწონს, როცა გაპრანჭულ კაბაზე აწეულ თმას ვატარებ.

ჩემი თმის ფერი მკვეთრი ცვლილებით ვერ წარმომიდგენია, ამიტომ არასდროს შემიღებავს. ექსპერიმენტისთვის თმას ვერ მოვკლავ. ზუსტად ვიცი, რომ ცვლილებას ვერ ავიტან და შეგუებაც გამიჭირდება.

ჩემი შვილი თმით დაიბადა, მაგრამ ერთი თვის რომ გახდა, წინა ნაწილში დასცვივდა და ვხუმრობ ხოლმე, მელოტი ბავშვი მყავს-მეთქი. მგონი, მასაც ხვეული თმა აქვს, რადგან დაბანის შემდეგ აქეთ-იქით გაურბის თმის ღერები.

პრეტენზიული არ ვარ, მაგრამ ჩემთვის ვარცხნილობას დიდი მნიშვნელობა აქვს, თუ როგორ განწყობაზე ვიქნები დღის განმავლობაში. ამიტომ დღეს ვნერვიულობდი, რა გამოვიდოდა, თუმცა ზუსტად ისე ვარ დავარცხნილი და გალამაზებული, როგორსაც ვეგუები.

ყოველდღიურად მსუბუქ მაკიაჟს ვატარებ. თვალზე კონტურული ტატუაჟი მაქვს გაკეთებული და დილით უკვე პრინცესა ვიღვიძებ. ამიტომ მხოლოდ ტუშს, პუდრსა და ტუჩსაცხს ვიყენებ.

აქცენტირებულ და მკვეთრ მაკიაჟს ძალიან იშვიათად ვიკეთებ. ეს მაშინ ხდება, როცა სატელევიზიო პროექტი მოითხოვს.

ტატუაჟის კორექცია რამდენიმე დღის წინ გავიკეთე და თვალზე განსაკუთრებულ აქცენტზე უარს ვიტყვი.

მარინა საფრონოვა, ვიზაჟისტი: სალომეს ძალიან ლამაზი სახე აქვს, რაც საშუალებას მაძლევს, ნებისმიერი ტიპის მაკიაჟი გავუკეთო, მაგრამ მის თხოვნას გავითვალისწინებ და მსუბუქ მაკიაჟს გავაკეთებ.

ძალიან მინდა, ჩრდილების წასმა ისე კარგად ვიცოდე, როგორც ამას პროფესიონალი ვიზაჟისტები ახერხებენ. ამისთვის ყველაფერი შევიძინე, მაგრამ, ალბათ, მიჩვევა და, პირველ რიგში, ნიჭი მჭირდება, რომ გამომივიდეს.

მარინა საფრონოვა, ვიზაჟისტი: სალომეს ტუჩზე ომბრეს გავუკეთებ, რაც დღეს ყველაზე ტრენდულია.

სახის კანს სახლის პირობებში იშვიათად ვუვლი. ეს მაშინ ხდება, როცა გოგოები შევიკრიბებით და ვინმეს რამე განსაკუთრებული, ოქროს ნიღაბი აღმოაჩნდება. ყოველდღე თვალებზე კიტრებს რომ ვილაგებდე და სახეზე არაჟანს ვისვამდე, ასეთი რამ არ ხდება.

როცა სახეზე ბევრი არაფერი გისვია, მაგრამ ცვლილება აშკარაა და ლამაზად გამოიყურები, ეს საუკეთესო მაკიაჟია, რაც ჩემს ვიზაჟისტ მარიამს კარგად გამოსდის.

ძალიან კმაყოფილი ვარ. აქედან პირდაპირ კაჭრეთში, საქმეზე მივდივარ. ერთ დღეს იქ გავატარებ და თან ცოტას დავისვენებ. მგონია, რომ ლამაზადაც გამოვიყურები.